*💥🎯🚨खुनाचा प्रयत्न करून फरार झालेला आरोपी पाचोऱ्यात जेरबंद!**💥🎯🚨भाजी मंडईत भाजी घेताना पोलिसांच्या गुन्हे शोध पथकाने आवळल्या मुसक्या*

राजेंद्र खैरनार | मुख्य संपादक, सत्य शोध न्यूज

पाचोरा : खुनाचा प्रयत्न केल्याप्रकरणी ठाणे जिल्ह्यातील किन्हवली पोलीस ठाण्यात दाखल असलेल्या गुन्ह्यातील फरार संशयित आरोपीस पाचोरा पोलिसांच्या गुन्हे शोध पथकाने मोठ्या शिताफीने पाचोरा शहरातील भाजी मंडई परिसरातून ताब्यात घेतले. प्रितम नवनीत पाटील (वय २५, रा. पाथर्डी फाटा, नाशिक) असे ताब्यात घेतलेल्या आरोपीचे नाव आहे.

मा. पोलीस अधीक्षक श्री. श्रीकांत ढिवरे यांच्या आदेशान्वये दि. ७ सप्टेंबर २०२६ रोजी सायंकाळी ५ वाजेपासून पाचोरा शहरात चोरी व मालमत्तेविषयक गुन्ह्यांतील आरोपींचा शोध घेण्यासाठी पाचोरा पोलिसांचे गुन्हे शोध पथक कार्यरत होते. यावेळी पोहेकॉ राहुल काशिनाथ शिंपी यांना गुप्त बातमीदारामार्फत प्रितम पाटील हा किन्हवली पोलीस ठाण्यात दाखल गंभीर गुन्ह्यात फरार असून, तो सध्या पाचोरा शहरात असल्याची माहिती मिळाली.

माहिती मिळताच पोलीस निरीक्षक राहुलकुमार पवार यांच्या मार्गदर्शनाखाली पथकाने तत्काळ कारवाई सुरू केली. संशयिताच्या मोबाईल क्रमांकाचे लोकेशन तपासले असता ते भाजी मंडई, पाचोरा परिसरात असल्याचे निष्पन्न झाले.

पोलिसांचे पथक तत्काळ भाजी मंडईत पोहोचले. तेथे एक संशयित इसम भाजीपाला खरेदी करताना पोलिसांच्या निदर्शनास आला. संशय बळावल्याने पोलिसांनी सायंकाळी सुमारे ६.३० वाजता त्यास ताब्यात घेत चौकशी केली. त्याने आपले नाव प्रितम नवनीत पाटील असल्याचे सांगितले.

सदर आरोपीविरुद्ध किन्हवली पोलीस ठाणे, जिल्हा ठाणे ग्रामीण येथे गुन्हा रजिस्टर क्रमांक ३३१/२०२६ अन्वये भारतीय न्याय संहिता २०२३ मधील कलम १०९ (१), ६१ (२), ११५ (२), ३५२, ३५१ (२) व ३ (५) अंतर्गत गुन्हा दाखल असल्याचे पोलिसांनी सांगितले.

पाचोरा पोलिसांनी आरोपीस ताब्यात घेतल्यानंतर याबाबत किन्हवली पोलिसांना माहिती देण्यात आली. त्यानंतर किन्हवली पोलीस ठाण्याचे पथक पाचोरा येथे दाखल झाले असून, प्रितम पाटील यास पुढील कायदेशीर कारवाईसाठी किन्हवली पोलिसांच्या ताब्यात देण्यात आले.

अधिकाऱ्यांच्या मार्गदर्शनाखाली धडाकेबाज कारवाई

ही कामगिरी पोलीस अधीक्षक श्री. श्रीकांत ढिवरे, अपर पोलीस अधीक्षक श्री. अशोक नखाते, उपविभागीय पोलीस अधिकारी श्री. बापू रोहम यांच्या मार्गदर्शनाखाली पोलीस निरीक्षक राहुलकुमार पवार, पोउपनिरीक्षक कृष्णा घायाळ, पोहेकॉ राहुल काशिनाथ शिंपी, पोहेकॉ गजानन देशमुख, पोको शरद मांगो पाटील व पोको श्रीराम अनिल शिंपी यांच्या पथकाने पार पाडली.