🐂🎉 बैलांच्या पूजनातून शेतकरी राजाने जपली कृतज्ञतेची परंपरा; पाचोऱ्यात पोळा सण उत्साहात संपन्न!

राजेंद्र खैरनार | मुख्य संपादक, सत्यशोध न्यूज तथा दैनिक तोफ पाचोरा तालुका प्रतिनिधी

पाचोरा : शेतकऱ्याच्या जीवनातील जिवाभावाचा साथीदार असलेल्या बैलांप्रती कृतज्ञता व्यक्त करणारा पारंपरिक पोळा सण पाचोरा शहरात मोठ्या उत्साहात व भक्तिमय वातावरणात नुकताच संपन्न झाला. गेल्या अनेक वर्षांपासून पाचोरा शहर व परिसरात पोळा सणाची परंपरा जपली जात असून यंदाही शेतकरी बांधवांनी उत्स्फूर्त सहभाग नोंदविला.

पोळ्यानिमित्त शेतकरी राजाने आपल्या बैलांना विविध रंगांनी सजवून, फुलांचे हार घालून तसेच आकर्षक साजशृंगार करून बैलांची विधिवत पूजा केली. कुटुंबातील सर्व सदस्यांनी बैलांचे औक्षण करून त्यांच्याप्रती असलेली आपुलकी आणि कृतज्ञता व्यक्त केली. त्यानंतर सजविलेल्या बैलांना शहरातून फिरवून पोळ्याचा आनंद साजरा करण्यात आला.

कृष्णापुरी भागातील श्री. नाना पाटील यांच्या परिवारातर्फेही बैलांची विधिवत पूजा करण्यात आली. यावेळी परिसरातील नगरसेवक श्री. अशोक आप्पा पाटील तसेच सामाजिक कार्यकर्ते लकी पाटील यांनी उपस्थित राहून बैलांचे पूजन केले. यामुळे पाटील परिवाराच्या आनंदात आणखी भर पडली.

पोळा हा केवळ सण नसून शेतकरी आणि त्याच्या बैलामधील जिव्हाळ्याचे नाते, कष्टाची जाणीव आणि कृषी संस्कृतीची समृद्ध परंपरा जपणारा सण म्हणून त्याचे विशेष महत्त्व आहे. पाचोऱ्यातील या उत्साहपूर्ण वातावरणातून ग्रामीण संस्कृती व परंपरा आजही तितक्याच जिवंत असल्याचे चित्र पाहायला मिळाले.