🇮🇳जवानांच्या मनगटावर राखी; राष्ट्रसेवेला माणुसकीचा मानाचा मुजर....! सबला उत्कर्ष फाउंडेशनचा अनोखा रक्षाबंधन सोहळा; एनसीसी जवानांना राखी बांधून मिठाईचे वाटप

राजेंद्र खैरनार पाचोरा मुख्य संपादक सत्य शोध न्यूज

छत्रपती संभाजीनगर : देशाच्या रक्षणासाठी सदैव तत्पर असलेल्या जवानांप्रती कृतज्ञता व्यक्त करत सबला उत्कर्ष फाउंडेशन, पडेगाव यांच्या वतीने रक्षाबंधन दिनानिमित्त एनसीसी जवानांना राखी बांधून व मिठाई खाऊ घालत अनोख्या पद्धतीने रक्षाबंधन साजरे करण्यात आले. मीरा नगर, पडेगाव येथे झालेल्या या उपक्रमातून राष्ट्रसेवेला सलाम करत जवानांप्रती असलेले प्रेम, आदर आणि कृतज्ञतेची भावना व्यक्त करण्यात आली.

२८ ऑगस्ट २०२६ रोजी रक्षाबंधनाच्या शुभमुहूर्तावर सबला उत्कर्ष फाउंडेशनच्या अध्यक्षा श्रीमती राजश्री राहुल चौधरी यांच्या नेतृत्वाखाली महिला सदस्यांनी ५० MH, ५-१-५७, NCC भवन, शासकीय अभियांत्रिकी महाविद्यालय, उस्मानपुरा, छत्रपती संभाजीनगर येथे उपस्थित राहून एनसीसी जवानांच्या मनगटावर प्रेमाने राखी बांधली.

यावेळी सुभेदार मेजर गिरीशचंद्र साहिब, नायब सुभेदार उमेद साहिब, माजी सुभेदार बशीर साहिब, माजी सुभेदार इंगळे साहिब, माजी हवालदार गणेश ढेपळे साहिब तसेच लिपिक मयूर कुलकर्णी यांना राखी बांधून मिठाईचे वाटप करण्यात आले. उपस्थित जवानांना रक्षाबंधनाच्या मनःपूर्वक शुभेच्छाही देण्यात आल्या.

या उपक्रमात आरती रवीश परदेशी, आरती रितेश परदेशी, श्रद्धा अमित परदेशी, कशिश कुमार, सिमरन चौधरी यांच्यासह सबला उत्कर्ष फाउंडेशनच्या महिला सदस्यांची उपस्थिती होती.

देशाच्या सीमांचे आणि नागरिकांचे रक्षण करण्यासाठी अहोरात्र कर्तव्य बजावणाऱ्या जवानांसोबत रक्षाबंधन साजरे करण्यामागे केवळ सणाचा उत्साह नसून राष्ट्रसेवकांप्रती आदर आणि कृतज्ञता व्यक्त करण्याचा सामाजिक संदेश असल्याचे फाउंडेशनच्या वतीने सांगण्यात आले.

यावेळी जवान तसेच एडीएम ऑफिसर लेफ्टनंट कर्नल कीर्ती मॅडम यांच्याशी महिला सदस्यांनी संवाद साधला. राष्ट्रसेवेसाठी जवान देत असलेल्या योगदानाला त्यांनी मनापासून सलाम केला.

“देशाचे रक्षण करणाऱ्या जवानांसोबत रक्षाबंधन साजरे करणे हा आमच्यासाठी अभिमानाचा क्षण आहे. जवानांच्या मनगटावर बांधलेली ही राखी त्यांच्या देशसेवेला आमचा मानाचा मुजरा आहे,” अशी भावना सबला उत्कर्ष फाउंडेशनच्या अध्यक्षा तथा सबला उत्कर्ष वृत्तपत्र दिल्ली व महाराष्ट्रच्या मुख्य संपादक श्रीमती राजश्री राहुल चौधरी यांनी व्यक्त केली.

वृक्षारोपणाचा संकल्पही चर्चेत

रक्षाबंधन कार्यक्रमादरम्यान लेफ्टनंट कर्नल कीर्ती मॅडम यांच्यासोबत सबला उत्कर्ष फाउंडेशनच्या आगामी वृक्षारोपण उपक्रमाबाबतही चर्चा करण्यात आली. फाउंडेशनच्या वतीने यापूर्वी १० जांभळाची, ५ आंब्याची आणि १० बदामाची झाडे लावण्यात आली असून, आगामी काळात आणखी वृक्षारोपण करण्याचा संकल्प व्यक्त करण्यात आला.

“एक पेड देश के नाम—एक झाड लावा, प्रदूषण वाचवा, सुंदर शहर–सुंदर वसुंधरा” तसेच “एक झाड, एक मूल—दोन्ही फुले वाचवा” या संकल्पनेतून सैनिकांच्या उपस्थितीत विशेष वृक्षारोपण कार्यक्रम आयोजित करण्याबाबतही यावेळी सकारात्मक चर्चा झाली.

रक्षाबंधनाच्या निमित्ताने जवानांच्या मनगटावर बांधलेली राखी आणि त्यांच्या हातात दिलेली मिठाई हा केवळ सणाचा भाग न राहता राष्ट्रसेवा आणि समाजसेवा यांच्यातील भावनिक नाते दृढ करणारा उपक्रम ठरला.