💥🎯🚨रोटरी क्लब पाचोरा-भडगावचा स्तुत्य उपक्रम : बुऱ्हानी शाळेतील ४०० विद्यार्थ्यांची मोफत आरोग्य तपासणी

राजेंद्र खैरनार | मुख्य संपादक, सत्य शोध न्यूज

पाचोरा : शहरातील बालकांच्या सर्वांगीण आरोग्य संवर्धनाच्या उद्देशाने रोटरी क्लब पाचोरा-भडगावच्या वतीने मंगळवार, २८ जुलै रोजी बुऱ्हानी इंग्लिश मीडियम स्कूल येथे भव्य मोफत आरोग्य तपासणी शिबिराचे आयोजन करण्यात आले. या शिबिरात इयत्ता पहिली ते चौथीतील सुमारे ४०० विद्यार्थ्यांची बालरोग व दंत आरोग्याची सखोल तपासणी करण्यात आली.

छत्रपती संभाजीनगर वसाहतीतील नवीन बुऱ्हानी शाळेच्या प्रांगणात झालेल्या उद्घाटन समारंभाला रोटरी क्लबचे अध्यक्ष प्राचार्य डॉ. शिवाजी शिंदे, प्रशासन सचिव डॉ. स्वप्निल पाटील, प्रकल्प सचिव डॉ. प्रशांत सांगडे, प्रोजेक्ट चेअरमन डॉ. अमोल जाधव, उपाध्यक्ष डॉ. अजयसिंह परदेशी, संजय कोतकर, चंद्रकांत लोढाया, पिंकीताई जिनोदिया, संजय पाटील, गिरीश दुसाने तसेच बुऱ्हानी संस्थेचे अध्यक्ष हातिमभाई बोहरी, सचिव मोहम्मदभाई बोहरी, स्कूल कमिटी चेअरमन ताहेरभाई कपाशी, व्हाईस चेअरमन मुस्तफा लकडावाला, प्रशासकीय अधिकारी बी. एन. पाटील, शाळेचे प्राचार्य, उपप्राचार्य व मान्यवर उपस्थित होते.

या शिबिरासाठी शहरातील १६ नामांकित बालरोगतज्ज्ञ, मुखरोग व दंतचिकित्सकांनी स्वयंप्रेरणेने सहभाग नोंदवत विद्यार्थ्यांची तपासणी केली. यामध्ये डॉ. अमोल पाटील, डॉ. ग्रीष्मा पाटील, डॉ. रोहित तावरे, डॉ. अनुराधा तावरे, डॉ. किरण राजपूत, डॉ. आनंद जैन, डॉ. सचिन चौधरी, डॉ. मुकेश तेली, डॉ. उमेश राठोड, डॉ. सिद्धांत तेली, डॉ. राहुल काटकर, डॉ. शुभेच्छा खिंवसरा, डॉ. जागृती सोनवणे, डॉ. शर्वरी तकाटे, डॉ. आदिती पाटील आणि डॉ. तेजस्विनी पाटील यांनी मोलाचे योगदान दिले.

शिबिरादरम्यान विद्यार्थ्यांच्या दातांची स्वच्छता, पोषण, वैयक्तिक स्वच्छता आणि निरोगी जीवनशैलीबाबत मार्गदर्शन करण्यात आले. डॉ. अमोल जाधव यांनी विद्यार्थ्यांना दंत आरोग्याविषयी ओघवत्या शैलीत माहिती दिली. उपस्थित दंतचिकित्सकांनी विद्यार्थ्यांना मोफत टूथब्रशचे वितरण केले. तपासणीत काही आरोग्यविषयक समस्या आढळलेल्या विद्यार्थ्यांच्या पालकांसाठी प्रिस्क्रिप्शनवर आवश्यक सूचना व उपचारांचा सल्लाही देण्यात आला.

कार्यक्रमाच्या प्रारंभी बुऱ्हानी शाळेतर्फे सर्व मान्यवरांचे स्वागत करण्यात आले. यावेळी डॉ. शिवाजी शिंदे व डॉ. स्वप्निल पाटील यांनी आरोग्य संवर्धनासाठी अशा उपक्रमांचे महत्त्व अधोरेखित केले. रोटरी क्लबतर्फे डॉ. प्रशांत सांगडे यांनी तर शाळेतर्फे बी. एन. पाटील यांनी उपस्थितांचे आभार मानले.

शिबिराच्या यशस्वी आयोजनासाठी विद्यालयाच्या पर्यवेक्षिका अस्मिता पाटील, मुख्याध्यापिका भगवती राऊत तसेच सर्व शिक्षक, शिक्षिका व शिक्षकेतर कर्मचाऱ्यांनी विशेष परिश्रम घेतले. विद्यार्थ्यांच्या आरोग्याची काळजी घेणारा रोटरी क्लब पाचोरा-भडगावचा हा उपक्रम पालक, शिक्षक आणि नागरिकांकडून कौतुकास पात्र ठरला.