💥🎯🚨आषाढी एकादशी निमित्त पाचोरा येथे फराळ व केळी वाटपाच्या सेवेला २० वर्षे पूर्ण; माऊली ग्रुप व बहुळेश्वर ग्रुपचा सेवाभावी उपक्रम

राजेंद्र खैरनार पाचोरा मुख्य संपादक सत्यशोध न्यूज

पाचोरा प्रतिनिधी

आषाढी एकादशीच्या पावन पर्वानिमित्त श्रीक्षेत्र पिंपळगाव हरे येथे दर्शनासाठी जाणाऱ्या भाविकांसाठी साबुदाणा फराळ व केळी वाटपाचा सेवाभावी उपक्रम यंदा २० व्या वर्षात यशस्वीपणे पूर्ण झाला. पाचोरा शहरातील माऊली ग्रुप व बहुळेश्वर ग्रुप यांच्या संयुक्त विद्यमाने गेल्या दोन दशकांपासून हा उपक्रम अखंडपणे राबविला जात असून, परिसरातील सेवाभावी नागरिक, ऑटोमोबाईल व गॅरेज व्यावसायिक, मॅकेनिक बांधव तसेच असंख्य देणगीदारांच्या सहकार्यामुळे ही सेवा वर्षागणिक अधिक व्यापक होत आहे.

आषाढी एकादशीच्या दिवशी श्रीक्षेत्र प्रती पंढरपुर पिंपळगाव हरे येथे दर्शनासाठी पाचोरा तालुक्यासह परिसरातील विविध भागांतून हजारो भाविक येतात. भाविकांची वाढती संख्या लक्षात घेऊन त्यांना पाचोरा येथे साबुदाणा फराळ व केळीचे वाटप करण्याचा उपक्रम सुरू करण्यात आला. आज हा उपक्रम भाविकांसाठी भक्ती, सेवा आणि सामाजिक बांधिलकीचे प्रतीक ठरला आहे.

सुरुवातीला केवळ ११ किलो साबुदाणा खिचडीपासून सुरू झालेला हा उपक्रम आज तब्बल ७५१ किलो साबुदाणा फराळ आणि ५० कॅरेट केळी,२० कॅरेट खिरे,काकडी वाटपापर्यंत पोहोचला आहे. या सेवाकार्यात भाविक, देणगीदार आणि स्वयंसेवकांचा उत्स्फूर्त सहभाग लाभत असून, दरवर्षी या उपक्रमाची व्याप्ती वाढत आहे.

या उपक्रमाचे आणखी एक वैशिष्ट्य म्हणजे आषाढी एकादशीच्या सुमारे महिनाभर आधीपासून संपूर्ण नियोजन केले जाते. माऊली ग्रुप व बहुळेश्वर ग्रुप यांच्या नेतृत्वाखाली स्वयंसेवक भक्तिभावाने तयारी करतात. देणगीदार कोणत्याही आग्रहाशिवाय स्वखुशीने आणि सद्भावनेने योगदान देत असल्यामुळे हा उपक्रम श्रद्धा, समाजसेवा आणि सामाजिक ऐक्याचा प्रेरणादायी आदर्श ठरला आहे.

आषाढी एकादशीच्या निमित्ताने गेली २० वर्षे अखंड सुरू असलेली ही सेवा भाविकांसाठी केवळ फराळ वाटप नसून विठ्ठलभक्ती, समाजसेवा आणि परस्पर सहकार्याचा सुंदर संगम म्हणून ओळखली जाते. यंदा या सेवाभावी परंपरेची २० वर्षे पूर्ण झाल्याने भाविकांमध्ये विशेष उत्साहाचे वातावरण पाहायला मिळाले.

या उपक्रमास पाचोरा तालुक्याचे तहसीलदार विजय बनसोडे, पोलीस उपविभागीय अधिकारी बापू रोहम, पोलीस निरीक्षक राहुलकुमार पवार, सहाय्यक पोलीस निरीक्षक प्रदीप शेवाळे, पाचोरा नगरपालिकेचे मुख्याधिकारी मंगेश देवरे पाचोरा रुग्णालयाचे डाॅ. सतीश टाक तसेच विविध सामाजिक, राजकीय व प्रशासकीय ,क्षेत्रातील  मान्यवरांनी पत्रकार बांधवांनी उपस्थित राहून सेवाभावी उपक्रमाचे कौतुक केले.