💥🎯🚨 मास्टर कीच्या सहाय्याने मोटारसायकल चोरी करणारा अट्टल चोरटा जेरबंद; पाचोरा पोलिसांची धडाकेबाज कारवाई, चार दुचाकींसह ₹१.२० लाखांचा मुद्देमाल जप्त

राजेंद्र खैरनार | मुख्य संपादक, सत्य शोध न्यूज

पाचोरा :

जळगाव जिल्ह्यासह पाचोरा शहरात मोटारसायकल चोरीच्या घटनांनी नागरिकांमध्ये निर्माण झालेल्या चिंतेला पाचोरा पोलिसांनी मोठा दिलासा दिला आहे. मास्टर कीच्या सहाय्याने बजाज प्लॅटिना मोटारसायकली चोरी करणाऱ्या अट्टल चोरट्याला पाचोरा पोलीस ठाण्याच्या गुन्हे शोध पथकाने जेरबंद करत त्याच्याकडून चोरीच्या चार मोटारसायकली हस्तगत केल्या आहेत. जप्त करण्यात आलेल्या वाहनांची एकूण किंमत ₹१ लाख २० हजार इतकी आहे.

जिल्ह्यात व पाचोरा शहरात वाढत्या वाहन चोरीच्या घटनांचा छडा लावून आरोपींना अटक करण्याबाबत पोलीस अधीक्षक श्रीकांत धिवरे यांनी पाचोरा पोलीस ठाण्याचे पोलीस निरीक्षक राहुलकुमार पवार यांना विशेष सूचना दिल्या होत्या. त्या अनुषंगाने गुन्हे शोध पथकाने तपासाची चक्रे वेगाने फिरवत ही उल्लेखनीय कामगिरी केली.

दि. २७ जुलै २०२६ रोजी वाहन चोरीच्या गुन्ह्यांचा तपास सुरू असताना पोलिसांना मिळालेल्या गोपनीय माहितीनुसार अमोल राजेंद्र ढमाळे (वय २७), रा. नंदीचे खेडगाव, ता. पाचोरा, ह.मु. काळे नगर, जळगाव हा जळगाव रोडलगत एका शेतातील शेडमध्ये लपून राहत असल्याचे निष्पन्न झाले. त्यानुसार पोलिसांनी सापळा रचून त्याला ताब्यात घेतले.

सखोल चौकशीदरम्यान आरोपीने चार मोटारसायकली चोरी केल्याची कबुली दिली. त्यानंतर त्याच्या ताब्यातून चारही चोरीच्या मोटारसायकली जप्त करण्यात आल्या. आरोपी बजाज प्लॅटिना मोटारसायकली मास्टर कीच्या सहाय्याने चोरी करत असल्याचे तपासात समोर आले.

या प्रकरणातील चोरीचे गुन्हे पाचोरा, भडगाव आणि एमआयडीसी वाळुंज (छत्रपती संभाजीनगर) पोलीस ठाण्यात बी.एन.एस. कलम ३०३(२) अन्वये दाखल आहेत.

जप्त करण्यात आलेला मुद्देमाल

- काळ्या रंगाची बजाज प्लॅटिना – किंमत ₹३०,०००

- काळ्या रंगाची बजाज प्लॅटिना – किंमत ₹३०,०००

- काळ्या रंगाची बजाज प्लॅटिना – किंमत ₹३०,०००

- काळा-सिल्व्हर रंगाची बजाज प्लॅटिना – किंमत ₹३०,०००

एकूण जप्त मुद्देमाल : ४ मोटारसायकली – किंमत ₹१,२०,०००

ही यशस्वी कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार यांच्या नेतृत्वात करण्यात आली.

या कारवाईत सपोनि प्रदीप शेवाळे, पोउपनि कृष्णा घायाळ, पोहेकॉ विलास पाटील, श्रीकांत गायकवाड, उमेश पाटील तसेच पोलीस कॉन्स्टेबल योगेश पाटील, संदीप पाटील आणि हरीश परदेशी यांनी सक्रिय सहभाग घेतला.

या कारवाईमुळे वाहनचोरांमध्ये मोठी दहशत निर्माण झाली असून, नागरिकांनी आपल्या वाहनांच्या सुरक्षेबाबत सतर्क राहून संशयास्पद हालचालींची माहिती तात्काळ पोलिसांना द्यावी, असे आवाहन पाचोरा पोलिसांनी केले आहे.