कृष्णापुरी वार्ड क्रमांक १४ मध्ये मतदार यादी पडताळणी शिबिर; नागरिकांना उपस्थित राहण्याचे आवाहन

राजेंद्र खैरनार(मुख्य संपादक) सत्य शोध न्युज 

पाचोरा (प्रतिनिधी) – प्रभाग क्रमांक १४, कृष्णापुरी परिसरातील नागरिकांसाठी मतदार यादी पडताळणीसंदर्भात महत्त्वपूर्ण शिबिराचे आयोजन करण्यात आले असून, प्रत्येक नागरिकाने आपल्या मताधिकाराची नोंद अचूक राहावी यासाठी या शिबिराचा लाभ घ्यावा, असे आवाहन करण्यात आले आहे.

उद्या, दि. १ एप्रिल २०२६ (बुधवार) रोजी सकाळी ९.०० ते दुपारी १२.०० या वेळेत मारोती मंदिर, कृष्णापुरी, पाचोरा येथे हे शिबिर पार पडणार आहे. या शिबिरात संबंधित विभागातील सर्व बीएलओ (Booth Level Officers) उपस्थित राहून नागरिकांच्या मतदार यादीतील नोंदी तपासणार असून, आवश्यक त्या दुरुस्त्या तसेच मार्गदर्शनही करण्यात येणार आहे.

विशेषतः ज्या नागरिकांची नावे २००२ च्या मतदार यादीत होती, परंतु २०२४ च्या अद्ययावत यादीत अद्याप मॅप झालेली नाहीत, अशा नागरिकांनी या शिबिरात हजर राहून आपली नोंद पूर्ण करून घ्यावी, असे स्पष्ट करण्यात आले आहे. यामुळे भविष्यात मतदानाच्या वेळी कोणत्याही प्रकारची अडचण निर्माण होणार नाही.

नगरसेवक प्रदीप भगवान वाघ आणि नगरसेविका सुरेखा अशोक पाटील यांनी नागरिकांना वेळेत उपस्थित राहून या शिबिराचा लाभ घेण्याचे आवाहन केले आहे. “प्रत्येक पात्र नागरिकाचे नाव मतदार यादीत असणे ही लोकशाही प्रक्रियेची मूलभूत गरज आहे. सक्रिय सहभागासाठी ही प्रक्रिया अत्यावश्यक आहे,” असे त्यांनी नमूद केले.

या उपक्रमामुळे मतदार यादी अधिक अचूक व अद्ययावत होण्यास मदत होणार असून, नागरिकांनी मोठ्या संख्येने सहभागी होऊन प्रशासनाला सहकार्य करावे, असेही आवाहन करण्यात आले आहे.