जिल्हा परिषद मराठी शाळा मोंढाळा येथे शिवजयंतीचा भव्य उत्सव; ‘छत्रपती शिवाजी महाराज की जय’च्या जयघोषांनी शाळा परिसर दुमदुमला
राजेंद्र खैरनार मुख्य संपादक सत्य शोध न्युज चॅनल
पाचोरा प्रतिनिधी:-
दिनांक : १९ फेब्रुवारी २०२६
स्थळ : जिल्हा परिषद मराठी शाळा मोंढाळा
अखंड भारताचे आराध्य दैवत, स्वराज्याचे संस्थापक छत्रपती शिवाजी महाराज यांची जयंती जिल्हा परिषद मराठी मोंढाळा शाळेत गुरुवार, १९ फेब्रुवारी रोजी अत्यंत उत्साहपूर्ण आणि मंगलमय वातावरणात साजरी करण्यात आली. सकाळी ठीक ८.३० वाजता कार्यक्रमास सुरुवात झाली. संपूर्ण शाळा परिसर भगव्या ध्वजांनी आणि जयघोषांनी भारावून गेला होता.
कार्यक्रमाच्या अध्यक्षस्थानी शालेय व्यवस्थापन समिती (SMC) चे सदस्य श्री. धनराज पाटील सर उपस्थित होते. तसेच SMC चे पदाधिकारी, शिक्षकवर्ग आणि मोठ्या संख्येने पालकवर्ग उपस्थित होता. प्रारंभी मान्यवरांच्या हस्ते छत्रपती शिवाजी महाराजांच्या प्रतिमेचे पूजन व पुष्पहार अर्पण करून अभिवादन करण्यात आले.
या ऐतिहासिक दिनाचे औचित्य साधून विद्यार्थी पारंपरिक वेशभूषेत शाळेत दाखल झाले होते. विद्यार्थ्यांनी ओघवत्या भाषणातून शिवरायांच्या पराक्रमशाली इतिहासाला उजाळा दिला. ‘शिवगर्जना’ व विविध शिवगीतांवर विद्यार्थ्यांनी सादर केलेल्या मनोहारी नृत्यप्रस्तुतीने उपस्थितांची मने जिंकली.
अध्यक्षीय भाषणात श्री. धनराज पाटील सरांनी छत्रपती शिवाजी महाराजांचे विचार आत्मसात करणे ही आजच्या काळाची गरज असल्याचे प्रतिपादन केले. शिवरायांचे स्वराज्य, शिस्त, राष्ट्रप्रेम व सामाजिक समतेचे विचार विद्यार्थ्यांनी अंगीकारावेत, असे त्यांनी आवाहन केले.
मुख्याध्यापक श्री. व्यंकट बोरसे यांनी कार्यक्रमास उपस्थित मान्यवर, पालक व शिक्षकांचे आभार मानले.
संपूर्ण कार्यक्रमाचे प्रभावी सूत्रसंचालन पदवीधर शिक्षक श्री. रविंद्र कुंभार यांनी केले. कार्यक्रम यशस्वी करण्यासाठी पदवीधर शिक्षक श्री. राजेंद्र कोळी, उपशिक्षिका श्रीमती मीना नेहरकर व श्रीमती राजश्री आहेर यांनी विशेष परिश्रम घेतले.
या शिवजयंती उत्सवामुळे विद्यार्थ्यांमध्ये राष्ट्रप्रेम, इतिहासाबद्दल अभिमान आणि शिवरायांच्या विचारांची प्रेरणा जागृत झाली असून संपूर्ण शाळा परिसर भक्तिभाव आणि उत्साहाने भारावून गेला होता.
Comments
Post a Comment