प्रजासत्ताक दिनी शिक्षणाला सामाजिक कृतज्ञतेची जोड : कै. देवराम दादा आखाडे यांच्या स्मरणार्थ मोंढाळे शाळेतील १५० चिमुकल्यांना स्कुल बॅगचे संजीवनीदान

राजेंद्र खैरनार मुख्य संपादक सत्य शोध न्यूज चॅनल

मोंढाळे | प्रतिनिधी

शिक्षण म्हणजे केवळ पुस्तके नव्हेत, तर संस्कार, संवेदना आणि समाजभान घडवण्याची प्रक्रिया आहे—याचा जिवंत प्रत्यय जि. प. प्राथमिक शाळा मोंढाळे, ता. पाचोरा, जि. जळगाव येथे प्रजासत्ताक दिनाच्या पावन पर्वावर आला. देशभक्ती, सामाजिक कृतज्ञता आणि शैक्षणिक बांधिलकी यांचा त्रिवेणी संगम या कार्यक्रमात पाहायला मिळाला.

७७ व्या प्रजासत्ताक दिनानिमित्त आयोजित विद्यार्थ्यांच्या विविध कला व गुणदर्शन कार्यक्रमाने परिसरात उत्साहाचे वातावरण निर्माण झाले होते. या आनंदोत्सवाला विशेष अर्थ प्राप्त झाला तो कै. देवराम दादा आखाडे यांच्या स्मरणार्थ राबविण्यात आलेल्या उपक्रमामुळे. त्यांच्या स्मृतीस अभिवादन म्हणून त्यांच्या पत्नी सौ. वत्सलाबाई देवराम आखाडे व जेष्ठ पुत्र प्रभाकर देवराम आखाडे यांच्या हस्ते शाळेतील सर्व १५० विद्यार्थ्यांना स्कुल बॅगचे मोफत वाटप करण्यात आले.

ग्रामीण भागातील विद्यार्थ्यांसाठी शैक्षणिक साहित्याचे महत्त्व लक्षात घेता हा उपक्रम केवळ मदत नव्हे, तर शिक्षणप्रवासाला नवी दिशा देणारा ठरला. स्कुल बॅग स्वीकारताना विद्यार्थ्यांच्या चेहऱ्यावर उमटलेला आनंद आणि आत्मविश्वास हा या उपक्रमाचा खरा यशमुद्रा ठरला.

कार्यक्रमाची सुरुवात ध्वजारोहणाने झाली असून, हे ध्वजारोहण सौ. वत्सलाबाई देवराम आखाडे यांच्या हस्ते संपन्न झाले. त्यानंतर विद्यार्थ्यांनी देशभक्तीपर गीते, भाषणे, नृत्य आणि इतर कलात्मक सादरीकरणातून राष्ट्रप्रेमाची भावना प्रभावीपणे व्यक्त केली. विद्यार्थ्यांच्या सादरीकरणाने उपस्थित पालक व ग्रामस्थ भारावून गेले.

या कार्यक्रमाचे प्रभावी व संयोजित सूत्रसंचालन पदवीधर शिक्षक राजेंद्र कोळी यांनी केले. कार्यक्रम यशस्वी होण्यासाठी मुख्याध्यापक व्यंकट बोरसे, गोपाल पाटील सर, मीना नेहरकर मॅडम, शाळा व्यवस्थापन समितीचे सदस्य तसेच पालकवर्ग यांनी अथक परिश्रम घेतले.

कार्यक्रमाच्या समारोपप्रसंगी पदवीधर शिक्षक रविंद्र कुंभार यांनी उपस्थितांचे आभार मानत समाजातील प्रत्येक घटकाने शिक्षणासाठी पुढे येण्याची गरज अधोरेखित केली.

हा उपक्रम म्हणजे कै. देवराम दादा आखाडे यांच्या सामाजिक जाणिवेचा जिवंत वारसा असून, शिक्षणाच्या माध्यमातून समाज घडवण्याचा आदर्श संदेश देणारा ठरला, अशी भावना सर्व स्तरातून व्यक्त करण्यात आली.