पाचोऱ्याच्या युवा नेतृत्वाची आंतरराष्ट्रीय झेप; YIN आमदार कल्पेश पाटील यांची मेक्सिकोच्या राजनैतिक अधिकाऱ्यांशी सकारात्मक चर्चा
राजेंद्र खैरनार(पाचोरा) मुख्य संपादक सत्यशोध न्यूज चॅनल
पाचोरा प्रतिनिधी :
पाचोरा येथील युवा नेतृत्वाला जागतिक स्तरावर नवी ओळख मिळवून देणारी घटना नुकतीच नाशिक येथे घडली. सकाळ मीडिया समूह आयोजित समर यूथ समिट कार्यक्रमात पाचोऱ्याचे YIN (यंग इन्स्पिरेटर्स नेटवर्क) आमदार कल्पेश मनोज पाटील यांनी मेक्सिकोच्या दूतावासातील अधिकारी Alejandro Sanchez de la Rosa यांची भेट घेऊन युवकांच्या प्रगतीसंदर्भात महत्त्वपूर्ण चर्चा केली.
या भेटीत पाचोरा तसेच देशातील युवकांसाठी मेक्सिकोमध्ये उपलब्ध असलेल्या विविध संधींचा आढावा घेण्यात आला. विशेषतः आयात-निर्यात (Import-Export) व्यवसाय, आंतरराष्ट्रीय व्यापार क्षेत्रातील सहभाग, उद्योजकता विकास तसेच रोजगाराच्या नव्या संधींबाबत सविस्तर संवाद साधण्यात आला.
जागतिकीकरणाच्या युगात युवकांनी केवळ स्थानिक पातळीवर न थांबता आंतरराष्ट्रीय स्तरावरील संधींचा शोध घ्यावा, नवीन बाजारपेठांचा अभ्यास करून स्वतःचे व्यवसाय व करिअर घडवावे, यावर दोन्ही मान्यवरांनी भर दिला. भारत आणि मेक्सिको यांच्यातील आर्थिक व व्यापारी संबंधांचा युवकांना कसा लाभ होऊ शकतो, याविषयीही सकारात्मक विचारांची देवाणघेवाण झाली.
या चर्चेमुळे पाचोरा तालुक्यातील तसेच ग्रामीण भागातील युवकांसाठी जागतिक व्यासपीठावर नव्या संधींची दारे खुली होण्याची अपेक्षा व्यक्त होत आहे. युवा नेतृत्व, दूरदृष्टी आणि आंतरराष्ट्रीय स्तरावरील संपर्क यांचा प्रभावी संगम साधत कल्पेश पाटील यांनी पाचोऱ्याचे नाव अभिमानाने उंचावले आहे.
Comments
Post a Comment