खेडगाव नंदीचे येथील शैक्षणिक जनजागृती मेळाव्यात गटशिक्षणाधिकारी विजय पवार यांचे प्रतिपादन; पाचोरा तालुक्यात गुणवत्तापूर्ण शिक्षणावर भर

राजेंद्र खैरनार पाचोरा मुख्य संपादक सत्य शोध न्यूज

ग्रामीण भागातील विद्यार्थ्यांना गुणवत्तापूर्ण शिक्षण उपलब्ध करून देण्यासाठी शासनासोबतच समाजातील विविध घटकांनी पुढाकार घेण्याची गरज आहे. खेडगाव नंदीचे येथे आयोजित करण्यात आलेला पटनोंदणी व शैक्षणिक जनजागृती मेळावा हा त्याच सकारात्मक विचारांचा उत्तम नमुना ठरला आहे.

आजच्या स्पर्धात्मक युगात जिल्हा परिषद शाळांबाबत समाजात निर्माण झालेल्या गैरसमजुती दूर करून या शाळांमधील गुणवत्तापूर्ण शिक्षण, अनुभवी शिक्षकवर्ग आणि विद्यार्थ्यांच्या सर्वांगीण विकासासाठी राबविण्यात येणारे उपक्रम यांची माहिती पालकांपर्यंत पोहोचविणे अत्यंत आवश्यक आहे. खेडगाव नंदीचे येथे झालेल्या मेळाव्यात याच उद्देशाने विद्यार्थी, पालक आणि ग्रामस्थांना एकत्र आणून शाळेचे महत्त्व पटवून देण्यात आले.

यावेळी पाचोरा तालुक्याचे गटशिक्षणाधिकारी विजय पवार यांनी ग्रामीण भागात दर्जेदार शिक्षण देण्यासाठी विशेष प्रयत्न करण्यात येतील, अशी ग्वाही दिली. आदर्श शिक्षिका उज्ज्वला वाडेकर यांनी पालकांच्या शंकांचे निरसन करत जिल्हा परिषद शाळांचे महत्त्व अधोरेखित केले. उद्योजक कल्पेश वाडेकर यांनी तरुणांना शिक्षणासोबतच व्यवसाय व स्पर्धा परीक्षांच्या तयारीबाबत मार्गदर्शन केले.

सरपंच राजेश वाडेकर यांनी विद्यार्थ्यांनी व पालकांनी जिल्हा परिषद शाळांकडे सकारात्मक दृष्टीने पाहावे व आपल्या पाल्यांचा प्रवेश जिल्हा परिषद शाळेत करून शिक्षण चळवळीला बळ द्यावे, असे आवाहन केले.

या उपक्रमाला ग्रामपंचायत पदाधिकारी, शाळा व्यवस्थापन समिती, सामाजिक कार्यकर्ते, शिक्षक, पालक व ग्रामस्थांचा उत्स्फूर्त प्रतिसाद लाभला. शिक्षाराज उज्ज्वल भारत फाउंडेशन आणि आदर्श शिक्षिका उज्ज्वला वाडेकर यांच्या वतीने सर्व विद्यार्थी व ग्रामस्थांसाठी आयोजित स्नेहभोजनामुळे कार्यक्रमाला सामाजिक बांधिलकीचीही जोड मिळाली.

ग्रामीण शिक्षणाच्या उन्नतीसाठी प्रशासन, शिक्षक, पालक आणि समाज यांच्यातील समन्वय किती महत्त्वाचा आहे, याची प्रचिती या मेळाव्यातून आली. अशा उपक्रमांमुळे जिल्हा परिषद शाळांबाबतचा विश्वास वाढून ग्रामीण भागातील शिक्षणाचा दर्जा उंचावण्यास निश्चितच मदत होणार आहे.