स्वामीभक्ती, सेवा आणि समर्पणाचा अद्वितीय संगम; राजेश काळे परिवाराच्या पुढाकारातून पाचोऱ्यात २१ व्या वर्षीही दिमाखात संपन्न झाला स्वामी समर्थ पादुका पालखी सोहळा

राजेंद्र खैरनार, पाचोरा | मुख्य संपादक, सत्य शोध न्यूज

पाचोरा : अनंतकोटी ब्रह्मांडनायक अक्कलकोट निवासी श्री स्वामी समर्थ महाराज यांच्या पवित्र पादुका पालखीचे पाचोरा शहरात आगमन होताच संपूर्ण परिसर भक्तिमय वातावरणाने भारावून गेला. गेल्या तब्बल २१ वर्षांपासून अखंड श्रद्धा, निस्सीम भक्ती आणि सेवाभाव जपत राजेश काळे व त्यांच्या परिवाराच्या पुढाकारातून हा धार्मिक सोहळा पाचोरा शहरात मोठ्या उत्साहात आयोजित केला जात आहे. यंदाही हजारो स्वामीभक्तांच्या उपस्थितीत हा सोहळा अत्यंत उत्साहपूर्ण आणि भक्तिरसात न्हाऊन निघालेल्या वातावरणात संपन्न झाला.

अक्कलकोट येथील स्वामी समर्थ अन्नछत्र मंडळाच्या वतीने महाराष्ट्रभर आयोजित करण्यात आलेल्या पादुका परिक्रमा उपक्रमाचा मुख्य उद्देश म्हणजे अक्कलकोट येथे प्रत्यक्ष जाऊन दर्शन घेणे शक्य नसलेल्या वृद्ध, महिला, आजारी तसेच दूरवर राहणाऱ्या स्वामीभक्तांना त्यांच्या गावातच स्वामी समर्थांच्या पादुकांचे दर्शन घडविणे हा आहे. या पवित्र उपक्रमासाठी पाचोरा शहरात गेली दोन दशके राजेश काळे व त्यांचा परिवार तन, मन आणि धनाने योगदान देत असून त्यामुळे हा सोहळा शहरातील एक महत्त्वाचा आध्यात्मिक उत्सव बनला आहे.

सायंकाळी पादुका पालखी शहराच्या प्रवेशद्वारावर दाखल होताच राजेश काळे, त्यांच्या धर्मपत्नी सौ. अश्विनी राजेश काळे व संपूर्ण परिवाराने पादुकांचे विधिवत पूजन करून स्वागत केले. "जय जय स्वामी समर्थ" च्या घोषणांनी परिसर दुमदुमून गेला. ढोल-ताशांचा गजर, टाळ-मृदुंगाचा निनाद, भजनी मंडळांचे भक्तिगायन आणि स्वामी नामस्मरणाने वातावरण पूर्णपणे भक्तिमय झाले होते.

स्वागतानंतर पादुका पालखीची भव्य मिरवणूक शहरातील विविध मार्गांवरून स्वामी लॉन्सकडे मार्गस्थ झाली. मार्गभर भाविकांनी फुलांची उधळण करून पादुकांचे दर्शन घेतले. अनेक नागरिकांनी घरासमोर आकर्षक रांगोळ्या काढून तसेच दीपप्रज्वलन करून पालखीचे स्वागत केले.

शहरातील प्रत्येक चौकात आणि रस्त्यावर स्वामी समर्थांच्या जयघोषांनी वातावरण भारावून गेले होते.

स्वामी लॉन्स येथे पालखीचे आगमन झाल्यानंतर विविध धार्मिक कार्यक्रमांना प्रारंभ झाला. यावेळी सिद्धी विनोद कुलकर्णी आणि धनश्री विनोद कुलकर्णी या भगिनींनी आपल्या मधुर स्वरांत स्वामी समर्थांची भजने, अभंग आणि भक्तिगीते सादर करून उपस्थित भाविकांना भक्तिरसाचा अनोखा अनुभव दिला. त्यानंतर स्वामी समर्थांच्या पवित्र पादुकांचे पूजन, आरती आणि नामस्मरणाचा कार्यक्रम पार पडला.

पादुकांच्या दर्शनासाठी भाविकांची मोठी गर्दी झाली होती. हजारो भक्तांनी शिस्तबद्ध पद्धतीने रांगेत उभे राहून दर्शन घेतले. भाविकांना कोणतीही गैरसोय होऊ नये यासाठी पिण्याच्या पाण्याची व्यवस्था, बसण्याची सुविधा, दर्शनासाठी स्वतंत्र नियोजन तसेच विविध सेवा सुविधा उपलब्ध करून देण्यात आल्या होत्या. या सर्व व्यवस्थेची जबाबदारी राजेश काळे, सौ. अश्विनी काळे आणि त्यांच्या परिवाराने अत्यंत समर्पित भावनेने सांभाळली.

रात्री हजारो भाविकांसाठी महाप्रसादाचे आयोजन करण्यात आले होते. महाप्रसाद व्यवस्था, भक्तांच्या स्वागताची तयारी, निवास व्यवस्था, दर्शन व्यवस्थापन आणि संपूर्ण कार्यक्रमाचे सुयोग्य नियोजन यामध्ये काळे परिवाराचे योगदान विशेषत्वाने अधोरेखित झाले. उपस्थित भाविकांनीही गेल्या अनेक वर्षांपासून स्वामी समर्थांविषयी असलेली त्यांची अखंड श्रद्धा आणि सेवाभाव याचे कौतुक करत हा सोहळा वर्षानुवर्षे अधिक भव्य होत असल्याची भावना व्यक्त केली.

या धार्मिक सोहळ्याच्या यशस्वी आयोजनासाठी विनोद कुलकर्णी, दत्ता सोनार, योगेश जहागिरदार, निलेश सोनार, अश्विन वाघ, स्वप्नील सोनार, प्रताप पाटील, गजू सोनार, राम जळतकर, संजय पाटील, किशोर पुराणिक, विजू मानकरे, सागर तांबोळे, प्रशांत सोनार, बंटी पाटील, प्रकाश पाटील, गौरव घोडके, प्रमोद तांबटकर, कमलेश सोनवणे, मोहित दत्तू, विशाल पाटील, प्राची आमले, सुवर्णाताई पाटील, सविताताई आमले, करिष्मा पवार, खुशी पाटील, संदीप सिसोदिया, संतोष पाटील, अतुल सिरसमणी, अमित वाणी, अनिल सोनार, अंकित अग्रवाल, संकेत तांबोळी, वेदांग राजेश काळे यांच्यासह अनेक स्वामीभक्तांचे मोलाचे सहकार्य लाभले.

तसेच पाचोरा शहरातील लक्ष्मी माता वारकरी संस्था परिवार, संस्थेचे प्रमुख योगेश महाराज, सौ. सुनीता योगेश माऊली, सर्व पत्रकार बांधव, पाचोरा पोलीस स्टेशनचे अधिकारी व कर्मचारी, सोनार गल्ली मित्र मंडळ आणि स्वामी लॉन्स व्यवस्थापन यांनीही सोहळ्याच्या यशस्वीतेसाठी महत्त्वपूर्ण भूमिका बजावली.

रात्री पालखीचा मुक्काम स्वामी लॉन्स येथे करण्यात आला. पहाटे काळे परिवाराच्या वतीने स्वामी समर्थांच्या पादुकांवर विधिवत अभिषेक करण्यात आला. वेदमंत्र, नामस्मरण आणि आरतीच्या मंगलमय वातावरणात हा धार्मिक सोहळा संपन्न झाला. अभिषेकानंतर भाविकांनी पुन्हा एकदा पादुकांचे दर्शन घेत स्वामी समर्थांचा आशीर्वाद प्राप्त केला. त्यानंतर पालखीने पुढील प्रवासासाठी मार्गक्रमण केले.

गेली २१ वर्षे अखंडपणे सुरू असलेली ही परंपरा केवळ धार्मिक कार्यक्रम न राहता स्वामीभक्ती, सेवाभाव आणि सामाजिक एकात्मतेचे प्रतीक बनली आहे. राजेश काळे, सौ. अश्विनी राजेश काळे आणि त्यांच्या परिवाराने जपलेली श्रद्धा, भक्ती व सेवाभावाची परंपरा पाचोरा शहरासाठी प्रेरणादायी ठरत असून भविष्यातही ही आध्यात्मिक परंपरा अशाच उत्साहात सुरू राहावी, अशी भावना उपस्थित हजारो स्वामीभक्तांनी व्यक्त केली.