“हरवलेला मोबाईल अवघ्या 45 तासांत शोधला; पाचोरा पोलिसांची तत्पर कारवाई ठरली नागरिकांसाठी दिलासादायक!”

 

राजेंद्र खैरनार मुख्य संपादक – सत्यशोध न्यूज चॅनल

पाचोरा शहरात हरविलेला मोबाईल अवघ्या 45 तासांच्या आत शोधून मुळ मालकाच्या ताब्यात देत पाचोरा पोलिसांनी पुन्हा एकदा आपल्या कार्यतत्परतेचा व जनसेवेच्या बांधिलकीचा प्रत्यय नागरिकांना करून दिला आहे. पोलिसांच्या जलद हालचालीमुळे व तांत्रिक तपासाच्या आधारे मोबाईल शोधण्यात यश आल्याने परिसरात पोलीस दलाचे मोठ्या प्रमाणात कौतुक होत आहे.

दि. 30 एप्रिल 2026 रोजी गणेश प्रशांत पाटील, रा. सिंदाड ता. पाचोरा जि. जळगाव यांचा मोबाईल जामनेर रोडवरील बिकनेर हॉटेल परिसरात हरविला होता. मोबाईल हरवल्यानंतर त्यांनी तत्काळ पाचोरा पोलीस स्टेशन येथे याबाबत माहिती दिली. सदर घटनेची गांभीर्याने दखल घेत मा. पोलीस निरीक्षक श्री राहुलकुमार पवार यांच्या मार्गदर्शनाखाली पोलिसांनी तातडीने तपासाची सूत्रे हलवली.

या प्रकरणात पोलीस कॉन्स्टेबल योगेश पाटील व पोलीस कॉन्स्टेबल गणेश कुंवर यांनी अत्यंत तत्परता दाखवत परिसरातील सीसीटीव्ही फुटेजची बारकाईने तपासणी केली. तांत्रिक माहिती व सीसीटीव्हीच्या आधारे त्यांनी हरविलेला मोबाईल शोधून काढत तो सुरक्षितपणे मुळ मालकाच्या ताब्यात दिला.

आजच्या काळात मोबाईल हा प्रत्येकाच्या दैनंदिन जीवनाचा महत्त्वाचा भाग बनला असून त्यामध्ये वैयक्तिक माहिती, आर्थिक व्यवहार तसेच अनेक महत्त्वाचे दस्तऐवज असतात. त्यामुळे हरविलेला मोबाईल इतक्या कमी वेळेत परत मिळाल्याने संबंधित नागरिकांनी समाधान व्यक्त केले असून पाचोरा पोलिसांचे मुक्तकंठाने कौतुक केले आहे.

पोलिसांनी दाखविलेली समयसूचकता, जबाबदारीची भावना आणि जनतेप्रती असलेली बांधिलकी यामुळे नागरिकांचा पोलिसांवरील विश्वास अधिक दृढ होत असल्याची भावना परिसरातून व्यक्त होत आहे.