"शासन दारी नाही… तर थेट जनतेच्या उंबरठ्यावर!” – पुनगावातील ‘महाराजस्व समाधान शिबीर’ ठरले जनतेसाठी दिलासा देणारे केंद्र

राजेंद्र खैरनार, मुख्य संपादक – सत्यशोध न्यूज चॅनल

पाचोरा तालुक्यातील पुनगाव येथे दि. 10 एप्रिल 2026 रोजी आयोजित करण्यात आलेले छत्रपती शिवाजी महाराज महाराजस्व समाधान शिबीर हे केवळ एक शासकीय उपक्रम नसून, शासनाची बदलती कार्यपद्धती आणि जनतेप्रती असलेली जबाबदारी याचे जिवंत उदाहरण ठरले.

कार्यक्रमाची सुरुवात छत्रपती शिवाजी महाराजांच्या प्रतिमेचे पूजन व दीपप्रज्वलन करून तहसीलदार श्री. विजय बनसोडे व नगरपरिषद गटनेते श्री. सुमित दादा किशोर पाटील यांच्या हस्ते करण्यात आली. प्रस्तावना मंडळ अधिकारी श्री. सुधाकर पाटील यांनी मांडली, तर सूत्रसंचालन माजी सरपंच श्री. चिंतामन पाटील यांनी केले.

छत्रपती शिवाजी महाराजांनी स्वराज्यात प्रजेच्या अडचणी तत्काळ सोडवण्याची जी परंपरा निर्माण केली, त्याच विचाराचा वारसा पुढे नेत शासनाने “महाराजस्व समाधान शिबीर” हा उपक्रम सुरू केला आहे. आणि पुनगावातील हे शिबीर त्या विचाराची प्रत्यक्ष अंमलबजावणी ठरले.

या शिबिरात महसूल, कृषी, सामाजिक न्याय, आरोग्य, ग्रामपंचायत, पाणीपुरवठा, एस.टी. महामंडळ आदी विभागांनी एकत्र येत नागरिकांच्या तक्रारी व अर्ज स्वीकृत करून त्यांचे तात्काळ निवारण करण्याचा प्रयत्न केला. शेकडो नागरिकांनी या शिबिरात सहभाग घेतला आणि विविध शासकीय योजनांची माहिती घेत प्रत्यक्ष लाभ मिळवला.

विशेष म्हणजे, संजय गांधी योजना, कृषी अवजारे वाटप, ई-शिधापत्रिका वितरण, NCMC कार्ड नोंदणी, ७/१२ उतारे, उत्पन्न दाखले, घरकुल प्रमाणपत्रे यांसारख्या सेवा एकाच छताखाली उपलब्ध करून देण्यात आल्या. एकूण 470 लाभार्थ्यांना विविध योजनांचा थेट लाभ देण्यात आला, ही या शिबिराची मोठी कामगिरी ठरली.

या वेळी व्यासपीठावर सरपंच सौ. सुनिता पाटील, चेअरमन श्री. प्रल्हाद पाटील, माजी सरपंच श्री. प्रल्हाद गुजर, उपसरपंच श्री. अनिलभाऊ पाटील, श्री. शिवलाल मोची यांच्यासह अनेक मान्यवर उपस्थित होते. तसेच महसूल कर्मचारी, पोलीस पाटील, रेशन दुकानदार व विविध विभागांचे अधिकारी मोठ्या संख्येने उपस्थित होते.

आजपर्यंत “शासन दारी या” अशी अपेक्षा नागरिकांकडून ठेवली जात होती. मात्र आता शासनच जनतेच्या दारी जाऊन समस्या सोडवू लागले आहे, हा सकारात्मक बदल आहे. पुनगावातील हे शिबीर म्हणजे केवळ औपचारिक कार्यक्रम नसून, व्यवस्थेतील संवेदनशीलतेचा आणि जबाबदारीचा ठोस पुरावा आहे.

जर अशा शिबिरांची सातत्याने अंमलबजावणी झाली, तर सामान्य नागरिकांना कार्यालयीन फेऱ्यांपासून मोठा दिलासा मिळेल आणि प्रशासनावरील विश्वास अधिक दृढ होईल — हेच या उपक्रमाचे खरे यश आहे.