फुले जयंतीनिमित्त नगरदेवळ्यात ज्ञानक्रांतीचा दीप प्रज्वलित” ‘क्रांतीज्योती सावित्रीबाई फुले मुलींची अभ्यासिका’ सुरू; ग्रामीण मुलींना स्पर्धा परीक्षांसाठी नवे व्यासपीठ! पाचोरा तहसिलदार विजय बनसोडे यांचीपण उपस्थिती...

राजेंद्र खैरनार

मुख्य संपादक, सत्य शोध न्यूज चॅनल

नगरदेवळा / प्रतिनिधी :-

महात्मा ज्योतीबा फुले जयंतीचे औचित्य साधत नगरदेवळा येथे ज्ञान, समानता आणि स्त्रीशिक्षणाच्या विचारांना मूर्त रूप देणारा प्रेरणादायी उपक्रम साकारला गेला आहे. शिवकन्या बहुउद्देशीय संस्थेच्या पुढाकारातून ‘क्रांतीज्योती सावित्रीबाई फुले मुलींची अभ्यासिका’ सुरू करण्यात आली असून, ग्रामीण भागातील मुलींसाठी ही एक मोठी शैक्षणिक क्रांती ठरत आहे.

महाराष्ट्राचे माजी उपमुख्यमंत्री स्व. अजितदादा पवार यांच्या स्मरणार्थ सुरू करण्यात आलेल्या या अभ्यासिकेचे उद्घाटन पाचोरा तहसीलदार विजय बनसोडे व नगरदेवळा सरपंच प्रतिक्षा किरण काटकर यांच्या हस्ते संपन्न झाले. यावेळी क्रांतीसूर्य महात्मा ज्योतीबा फुले आणि क्रांतीज्योती सावित्रीबाई फुले यांच्या प्रतिमांचे पूजन करून सामाजिक परिवर्तनाच्या विचारांना अभिवादन करण्यात आले.

ग्रामीण भागातील मुलींना अभ्यासासाठी सुरक्षित, शांत आणि योग्य वातावरण मिळावे या उद्देशाने शिवकन्या बहुउद्देशीय संस्थेच्या संस्थापक अध्यक्षा अभिलाषा रोकडे यांनी स्वखर्च आणि अथक परिश्रमातून ही अभ्यासिका उभी केली आहे. त्यांच्या या जिद्दीला दिगर विकासो सोसायटी आणि मा. आ. दिलीप भाऊ वाघ युवा फाउंडेशन यांचेही मोलाचे सहकार्य लाभले.

या अभ्यासिकेमुळे नगरदेवळ्यातील सुमारे 70 ते 80 तरुणींना अभ्यासासाठी स्वतंत्र जागा उपलब्ध झाली आहे. विशेषतः पोलीस भरती तसेच विविध स्पर्धा परीक्षांची तयारी करणाऱ्या मुलींना या उपक्रमाचा मोठा फायदा होणार आहे. या सुविधेमुळे त्यांच्या स्वप्नांना आता नवे पंख मिळाले असून, अनेक मुलींनी समाधान व्यक्त करत आयोजकांप्रती कृतज्ञता व्यक्त केली.

कार्यक्रमात बोलताना तहसीलदार विजय बनसोडे यांनी स्पर्धा परीक्षा म्हणजे स्वतःशी असलेली लढाई असल्याचे सांगितले. सातत्य, आत्मविश्वास आणि योग्य दिशेने केलेली मेहनतच यशाचे खरे सूत्र असल्याचे त्यांनी नमूद केले. स्वतःच्या प्रवासाचा उल्लेख करत त्यांनी 17-18 तास अभ्यास करून यश संपादन केल्याचा अनुभव सांगितला आणि भविष्यात मुलींना मार्गदर्शन करण्याचे आश्वासन दिले.

यावेळी सरदार एस. के. पवार विद्यालयाचे प्राचार्य किरण काटकर व प्रा. उमेश काटकर यांनीही विद्यार्थिनींना मार्गदर्शन केले. तसेच सरपंच प्रतिक्षा काटकर व प्राचार्य किरण काटकर यांनी अभ्यासिकेसाठी आवश्यक शैक्षणिक साहित्य उपलब्ध करून देण्याची ग्वाही दिली.

या प्रसंगी संस्थापक अध्यक्षा अभिलाषा रोकडे, डॉ. वैशाली अभय पाटील, माजी ग्रामपंचायत सदस्य राजेंद्र महाजन, संचालक इंद्रनील भामरे, सामाजिक कार्यकर्ते गणेश देशमुख, ज्येष्ठ पत्रकार प्रकाश जगताप, पत्रकार संजय सोनार, जितेंद्र परदेशी, रावसाहेब राऊळ, विश्वनाथ निकुंभ, हसीबूर शेख तसेच ग्रामस्थ मोठ्या संख्येने उपस्थित होते.

कार्यक्रमाचे सूत्रसंचालन व आभार प्रदर्शन विकासो सोसायटीचे संचालक इंद्रनील भामरे यांनी केले.

तात्पर्य :-

नगरदेवळ्यात सुरू झालेली ही अभ्यासिका केवळ एक सुविधा नसून, ती ग्रामीण मुलींच्या स्वप्नांना बळ देणारी आणि समाजातील स्त्रीशिक्षणाच्या चळवळीला नवे बळ देणारी “ज्ञानक्रांती” ठरत आहे. भविष्यात अशा उपक्रमांची गरज अधिक असून, समाजानेही अशा प्रयत्नांना हातभार लावणे ही काळाची गरज आहे.