महाशिवरात्रीत शेंदुर्णीच्या काशी विश्वेश्वर शिवालयात १० तासांत साकारली शंकर–पार्वतींची भव्य रांगोळी; भाविकांचे लक्ष वेधणारे भक्ती व कलेचे अद्भुत दर्शन

राजेंद्र खैरनार मुख्य संपादक सत्य शोध न्यूज चॅनल

शेंदुर्णी प्रतिनिधी –

काशी विश्वेश्वर शिवालय, शेंदुर्णी येथे महाशिवरात्रीच्या पावन पर्वानिमित्त भक्ती, कला आणि समर्पणाचा सुरेख संगम पाहायला मिळाला. मंदिर परिसरात भगवान शंकर व माता पार्वती यांची भव्य व आकर्षक रांगोळी साकारण्यात आली असून, या कलाकृतीने भाविकांचे मन अक्षरशः जिंकले आहे.

सुमारे १० तासांच्या अथक परिश्रमानंतर ही रांगोळी पूर्ण करण्यात आली. रंगसंगती, सूक्ष्म बारकावे आणि दिव्य भावमुद्रा यांमुळे शंकर–पार्वतीचे रूप अत्यंत जिवंत, प्रसन्न आणि भक्तीमय भासत होते. महाशिवरात्रीच्या मंगल वातावरणात या कलाकृतीने भक्तिभाव अधिकच वृद्धिंगत केला.

ही अप्रतिम रांगोळी पाचोरा येथील कुशल रांगोळी कलाकार शैलेश कुलकर्णी, अमन कुमार शहा, ओमकार केंडाळे व वैष्णवी पाटील यांनी साकारली. त्यांच्या कलागुणांसोबतच भक्तीभाव आणि समर्पणाचीही प्रचिती या सादरीकरणातून आली.

दर्शनासाठी आलेल्या भाविकांनी या रांगोळीचे मनापासून कौतुक केले. अनेकांनी छायाचित्रे घेत कलाकारांचे अभिनंदन केले. महाशिवरात्रीच्या निमित्ताने साकारलेली ही भव्य कलाकृती मंदिर उत्सवातील प्रमुख आकर्षण ठरली असून, शेंदुर्णीच्या सांस्कृतिक परंपरेत एक सुंदर आणि प्रेरणादायी भर घालणारी ठरली आहे.