भैरवनाथ महाराजांच्या कृपेने बहीरमनगर पाचोरा येथे अन्नदानाचा महाप्रसाद; भक्ती-सेवेचा भव्य संगम

राजेंद्र खैरनार मुख्य संपादक सत्य शोध न्यूज चॅनल

पाचोरा प्रतिनिधी :

श्रद्धा, सेवा आणि सामाजिक बांधिलकी यांचे प्रतीक ठरलेल्या श्री भैरवनाथ महाराज अन्नदान कार्यक्रमाचे आयोजन सालाबादप्रमाणे यंदाही पाचोरा शहरात करण्यात आले आहे. दि. 11 जानेवारी 2026 (रविवार) रोजी भैरवनाथ नगर (बहीरम नगर), कृष्णापुरी, पाचोरा येथील श्री भैरवनाथ मंदिरात हा अन्नदान सोहळा मोठ्या भक्तिभावात संपन्न होणार आहे.

भैरवनाथ महाराज हे श्रद्धेचे व रक्षणाचे दैवत मानले जात असून त्यांच्या कृपेने सर्वांवर सुख-समृद्धी नांदावी, या भावनेतून हा उपक्रम दरवर्षी राबविला जातो. अन्नदान ही केवळ धार्मिक परंपरा नसून समाजातील उपेक्षित घटकांपर्यंत माणुसकी पोहोचविण्याचे प्रभावी माध्यम आहे, असे आयोजकांचे मत आहे.

या अन्नदान कार्यक्रमात सर्व भाविकांसाठी महाप्रसादाची सुसज्ज व्यवस्था करण्यात आली आहे. कोणताही भेद न ठेवता प्रत्येकाने प्रसादाचा लाभ घ्यावा, हा या उपक्रमाचा मुख्य उद्देश आहे. भैरवनाथ नगर व परिसरातील नागरिक, युवक मंडळे व स्वयंसेवक या कार्यक्रमाच्या यशस्वीतेसाठी नियोजनबद्ध परिश्रम घेत आहेत.

मंदिर परिसरात स्वच्छता, शिस्त व भक्तीमय वातावरण निर्माण करण्यावर भर देण्यात आला असून हा सोहळा भक्तांसाठी अध्यात्मिक समाधान देणारा आणि समाजासाठी एकोप्याचा संदेश देणारा ठरणार आहे.

तरी सर्व भाविक-भक्तांनी कुटुंबासह उपस्थित राहून भैरवनाथ महाराजांच्या महाप्रसादाचा लाभ घ्यावा, असे आवाहन आयोजकांतर्फे करण्यात आले आहे.